Este parque, nace froito da solidariedade e da defensa do medio ambiente. Supón a culminación dun proxecto común de toda a cidade, xa que nos permite pechar unha das páxinas máis difíciles que nos tocou vivir na historia da cidade: o derrubamento do vertedoiro do mesmo nome.

No Parque de Bens os veciños da Coruña e os seus visitantes poden pasear e descubrir novas vistas sobre a cidade, o golfo Ártabro ou o mar aberto, vistas perdidas desde facía anos. Desta maneira tamén se recuperou a mirada.

O 5 de xuño de 2001, menos de cinco anos despois do derrubamento do antigo vertedoiro, e coincidindo co Día Munidal do Medio Ambiente, inaugurábase o espazo.

Pero o Parque de Bens é moito máis: moito máis que amplas zonas verdes, carreiros e lagoas. É, sobre todo, unha nova forma de pensar a Terra, o noso planeta, feita realidade. O Parque de Bens é recuperación e conservación de valores naturais, históricos, paisaxísticos e arquitectónicos.Todo iso integrado no desenvolvemento das nosas capacidades como cidadáns e como cidade.

O Parque de Bens é harmonía. Entre cada un de nós e a natureza.