Que mercar na Coruña?

Como cidade de referencia no sector téxtil e artesanal, A Coruña será o teu destino de preferencia para unha experiencia de compras única. Unha das mellores experiencias das persoas visitantes é acudir a Juan Flórez para gozar da primeira tenda de Zara da historia.

Amancio Ortega abriuna en 1975 e case medio século despois segue albergando o buque insignia de Inditex. O xigante téxtil influíu de xeito determinante na cidade, onde apareceron numerosos deseñadores e firmas que están na vangarda europea da moda.

Unha experiencia única e a medida

Ademais das tendas do xigante téxtil, na praza de Lugo, meca da moda coruñesa, atoparás espazos de moda innovadores que chaman de inmediato a atención das e dos visitantes. Un bo exemplo é o caso de Masscob, dabondo coñecida no panorama nacional, cunha mestura de pezas clásicas e contemporáneas atemporais. A súa tenda, da rúa Picavia 1, é xa un referente para as/os amantes da moda.

Knitbrary é outra das firmas coruñesas que están a marcar tendencia. O estudio da rúa Orzán de Yolanda Estévez e Pedro Casteláns conta cun claro sinal de identidade, pezas de punto tecidas artesanalmente con fiados de alta calidade.

Como capital da moda A Coruña viu nacer proxectos téxtiles singulares como é o showroom Bëlasabela, de Paula Núñez, que comezou nun primeiro piso ao máis puro estilo neoiorquino. Agora podémola atopar na rúa Emilia Pardo Bazán.

Xoierías e vestidos de noiva

As xoias non son unha excepción no berce da moda galega. Carla Barral e Javier González crearon Rígido Jewelry, unha marca baseada en pezas genderless nas que destaca a beleza da propia imperfección que lle confire a artesanía. Tamén no mundo da bixutería destaca Sansoeurs, creada polas irmás Sánchez, que converteron as súas pezas nunha das firmas máis innovadoras do panorama internacional. Na Coruña a súa boutique está na rúa Juana de Vega.

A poucos metros sitúase outra das marcas made in Coruña creada por José Antonio Conde nos anos noventa, Alba Conde. Os seus vestidos, de liñas finas e elegantes xa se expanden por todo o globo.

Outro dos grandes atractivos da moda coruñesa é o deseño de vestidos de noivas. Especial mención merece 6ème galerie, cunha formulación baseada en produtos reutilizables, que se poderán utilizar alén das nupcias e cun toque prêt-à-porter.

Gana de máis? Catro recomendacións extra para todas as ocasións

Para as e os trend hunters chegados de todo o mundo é recomendable a firma de Noela Rivera, Nonne. Esta firma coruñesa, situada na rúa Juan Flórez, é coñecida polos seus deseños versátiles de fabricación tradicional.

Outra das propostas máis rechamantes é Nael Swimwear, situada na rúa Rei Abdulah, e ideada por Elvira Pesquera e Natalia Otero. Unha firma de traxes de baño e bikinis sostible para todo tipo de corpos. Igual de rechamante é a marca Blue Anemone, creación de Iría Sáez, cunha filosofía sostible na que as súas pezas pretenden evocar o espírito dos anos 60 e 70.

Unha visita obrigada para o visitante é o obradoiro Branqueta de Maialen. Pezas feitas artesanalmente coas súas propias mans, limitadas; non hai dúas exactamente iguais. Ademais, o taller ofrece unha experiencia única; remangarse e crear baixo a atenta mirada da deseñadora.

Continuando a viaxe pola artesanía, ningún visitante debería perderse as cerámicas de Sargadelos. A identidade galega ten aquí a súa maior expresión coa combinación do branco e o azul cobalto. Máis de 200 anos de tradición contémplanse no complexo Sargadelos impulsado por Isaac Díaz Pardo e Luís Seoane.

Este tour polos espazos de moda é intenso, pero, sen dúbida, é un reto para os caza tendencias e amantes do deseño. Recomendámosche facer maridaxe con estas visitas nun descanso nas terrazas da Mariña cun bo viño branco e o marisco que chega directamente e a escasos metros da lonxa coruñesa.