Dúas décadas de traballo e o apoio de tres institucións -Concello, Deputación e Xunta- foron precisos para lle dar forma a un volume que recolle o labor de investigación desenvolvido polos músicos, divulgadores e investigadores Pablo Díaz Carro e Olga Kirk Martínez para recompilar distintas manifestacións da tradición popular de Cabana. Coplas, disputas dialécticas improvisadas, cantos de Nadal e de cego, parrafeos, arrolos e outras formas de expresión orais deslízanse polas páxinas dun volume convertido así mesmo en homenaxe a aquelas persoas maiores que as preservaron na súa memoria e que lles abriron as portas das súas casas a Díaz e Kirk para garantir que non desaparecesen. É por iso que os nomes de todos eles e todas elas ocupan un lugar destacado nas páxinas do libro.