O vindeiro luns 17 de marzo ás 19.00 h, na Biblioteca Municipal Fórum, teremos a presentación do libro "Los más importantes cómics de aventuras: en prensa, cómics books, álbums e cómics" de Julio David Sotelo.

O autor estará acompañado na presentación polo artista Siro López e o exalcalde da Coruña, Francisco Vázquez.

"Son un creador e polo tanto o meu mundo está feito de imaxes vistas por min mesmo ou formadas na miña imaxinación despois de ler ou escoitar unha narración, un conto ou unha sensación." (Hugo Pratt)

AUTOR:

Julio David Sotelo posúe unha longa traxectoria de máis de trinta anos, tanto no campo do deseño gráfico, como no do humor gráfico. Obtivo xa no afastado ano 1972 o 2.° Premio Nacional, no apartado de historieta gráfica, no 1° Certame Literario de Universidades Laborais.

Na década dos oitenta do pasado século, publicou tamén chistes no diario La Voz de Galicia, nas páxinas dedicadas a pasatempos, no Suplemento de Economía e Consumo, e a comezos do novo século, no Suplemento Humorístico Xatentendo.com.

Tamén se dedicou á restauración de cómics antigos, dos que non existen orixinais, tendo que partir para o seu traballo do xa publicado (a maior parte das veces en prensa, co que as cores están moi alteradas, xa sexa polo paso do tempo, a escasa calidade do papel de prensa, ou ambas as cousas). Na maior parte das páxinas, as cores áchanse fóra de rexistro, o que implica un traballo engadido.

Os seus traballos máis sinalados son as primeiras sundays da serie Casey Ruggles do autor Warren Tufts, e a totalidade das sundays de Johnny Comet do gran Frank Frazetta. Nestas últimas sundays a cor foi realizada de novo, seguindo fielmente as técnicas dos anos cincuenta, só que utilizando o ordenador e un programa adecuado para esa tarefa. O mellor restaurador de cómics de España! Manuel Caldas (restaurador e editor portugués). "You work is important to our industry and we wish you continued good fortune in your career". Michael Chen (Academic Supervisor) The Joe Kubert School of Cartoon & Graphic Art, Inc.

DESCRICIÓN:

A palabra cómic naceu en EE.UU. para designar nun principio os debuxos humorísticos como Yellow Kid pero logo, co paso do tempo, foi abarcando outros campos, como a aventura, a ciencia ficción, o xénero policíaco... O cómic en prensa orientouse nos seus comezos á xente traballadora que, nos albores do século XX, moitos eran inmigrantes que non dominaban ben o idioma inglés. Ao ir orientado ao consumo de masas, sempre foi considerado (ata hai poucos anos) como unha arte menor, unha arte de usar e tirar, que en definitiva non era arte; entendendo a arte como algo ao alcance de minorías privilexiadas.

O cómic sempre foi un reflexo, máis ou menos claro, do momento social no que se desenvolve. Como proba fidedigna diso, temos os cómics de Dick Tracy, xurdido cando a depresión estadounidense, e o posterior auxe das bandas armadas os coñecidos como gángsters; tamén temos a Terry and the Pirates que, xunto con moitos outros personaxes como The Phantom e Flash Gordon, reflicten o que nese momento se denominaba o perigo amarelo, causa esta polo que, ao comezo, os malvados teñen trazos orientais. Os personaxes anteriormente citados, xunto con outros máis, e do mesmo xeito que ocorreu no ámbito dos cómics book, tamén se verán envoltos no conflito por excelencia como foi a Segunda Guerra Mundial, e que supuxo un punto de inflexión no devir dos cómics de prensa. Por mor dese devastador conflito, virá outra guerra soterrada, a época da chamada guerra fría entre Occidente e a URRS, que se reflectirá en cómics como Johnny Hazard, Terry and the Pirates e James Bond, baseado nas novelas de Ian Fleming.

O cómic tamén se fai eco da toma de conciencia da muller, nun momento en que esta loita por equipararse ao home no aspecto sociolaboral. Xorden así cómics (máis nos cómic books que na prensa diaria), nos que ela é a protagonista, Modesty Blaise, Mary Worth, Apartment 3G, mentres que noutros, nos que simplemente era unha comparsa do protagonista home, adquire gran relevancia aínda que. iso si, non lle quita o posto ao home, pero aos poucos.

Acceso libre ata completar a capacidade