O festival VIÑETAS DESDE O ATLÁNTICO deu o pistoletazo de saída á súa programación expositiva coa inatuguración da exposición QUINO NA MÚSICA, unha homenaxe sen precedentes á obra do debuxante arxentino Joaquín Salvador Lavado Teixugo, Quino (1932-2020), centrada na súa relación fonda e constante coa música. A mostra poderá visitarse ata o 21 de setembro de 2025.

Con máis de 100 debuxos orixinais, entre eles tiras publicadas entre os cincuenta e finais dos noventa, QUINO NA MÚSICA mostra como a música, do tango ao rock, da música clásica ao pop, está presente en toda a traxectoria do autor. Desde o amor de Mafalda polos Beatles ata a crítcica á censura ou aos poderes establecidos a través da música, a exposición permite redescubrir a riqueza expresiva, estética e ideolóxica dunha das voces máis sigulares do humor gráfico contemporáneo.

A mostra está comisariada pola xornalista e investigadora arxentina Judith Gociol, autora de obras como "Universo Mafalda" ou "Humor gráfico en Argentina", e por Guillermo Lavado, músico profesional e sobriño do artista, quen inspirou o personaxe de Guille na soada serie Mafalda. Foi producida inicialmente polo festival Cómic Nostrum de Palma de Mallorca e chega por primeira vez á Coruña, e á Península, da man do Viñetas desde o Atlántico.