- Inicio
- Detalle
5 plans para gozar o Día da Nai este fin de semana
Como cada primeiro domingo de maio, en España celébrase o Día da Nai. Unha efeméride coa que moita xente se identifica e agradece o amor e esforzo da súa nai (ou da persoa feminina que a coida e apoia) cun detalle. Un presente material ou inmaterial que adoita ir acompañado de bicos, abrazos e, por suposto, tempo xuntos. Así que se esta fin de semana te atopas na Coruña, non perdas estes cinco plans para gozar dun Día da Nai ben completo.
UN BRUNCH
Es de bowls de açaí ou tostadas de ovo escalfado con aguacate? Un té matcha ou un café con leite? Un croissant ou tostadas con xamón e tomate? Dá igual o que che guste almorzar para comezar o día porque esta fin de semana queremos que probes algún dos xantares ou brunchs máis espectaculares da cidade. Algúns mesmo son pet friendly, así que non terás ningún problema en acudir coas túas mascotas.
MERCAR ARTESANÍA LOCAL
Na Coruña respírase arte, deseño e moda, sendo fonte de inspiración para creativos e o marco perfecto para as mellores expresións artísticas. Aquí atoparás pequenos comercios con pezas únicas (tanto de moda, como de artesanía), estudos nos que se cociñan as próximas tendencias ou grandes superficies para que teñas todo a man.
TARDE DE PÍCNIC
Dise, cóntase e rumoréase que na Coruña se come de marabilla e, por suposto, non seremos nós quen digamos o contrario. Peixes, mariscos, carnes, produtos da horta de quilómetro cero, cociña tradicional e de vangarda... Por todo iso somos referente na gastronomía atlántica, pero esta vez queremos que goces dos pequenos praceres da vida cun pícnic. Cos teus como mellor compañía e con racións de tortilla, luras do cantábrico e unha rica empanada, poderás desfrutar dunha comida ou unha merenda en calquera parque ou areal da cidade.
DÍA DE AUTOCOIDADOS
Son varias as dúbidas que nos asolagan cando temos ou queremos dar un agasallo, aínda que estamos seguros de que un día para o autocoidado sempre triunfa. Unha masaxe relaxante, un tratamento para liberar o estrés do día a día ou simplemente unha xornada de piscina son perfectos para celebrar o Día da Nai. Na Coruña tes a opción de acudir a Termaria-Casa da Auga para escapar da rutina.
DESPEDIR O DÍA MIRANDO AO HORIZONTE
E o noso quinto plan é cita case obrigatoria tanto para os coruñeses e coruñesas como para os que chegades de escapada ou vacacións. Convidámosvos a despedir o Día da Nai mirando ao horizonte desde a Torre de Hércules, todo un símbolo da nosa cidade e o noso pasado.
