Concello da Coruña

Concello da Coruña

Abraza a primavera na Coruña

Parque do monte de San Pedro

Os días son máis longos e a luz do sol inunda cada vez máis a cidade. Pódese respirar o aroma primaveral en cada esquina.

Coa chegada da primavera os múltiples parques e xardíns da cidade recuperan o seu esplendor. De feito, esta é unha época ideal para visitarnos, e por iso recompilamos neste artigo os mellores lugares que visitar e os nosos plans primaverais favoritos.

Tempada de pícnics...

A nosa cidade é verde. Contamos con amplo abano de xardíns onde perderse, relaxarse, pasear tranquilamente e inauguramos o primeiro pícnic da estación.

As suaves temperaturas animan a cidadanía coruñesa para xantar en paraxes idílicos como o parque de Santa Margarida, o monte de San Pedro, o parque de Bens ou o parque escultórico da Torre de Hércules.

E, por suposto, recomendámosche que aproveites os últimos raios de sol para merendar ou cear en praias emblemáticas como Riazor, Orzán ou As Lapas. Sen dúbida, será o broche de ouro a un día espectacular.

... e de xeados

Coa suba das temperaturas xa apetecen os xeados e na zona da Mariña atoparás os mellores. Síntete un/unha verdadeiro/a coruñés/a escollendo entre as seis xeaderías principais. Desde clásicos como a Colón ata outros máis actuais como Bico de xeado, que se concentran neste paseo de 450 metros e cuxa visita é obrigada en canto sae o sol.

Renova o armario de cara ao verán

Co inicio da primavera xa empezamos a pensar no momento do cambio de armario e A Coruña é o destino ideal para facelo. A capital da moda galega é referente a nivel internacional non só pola súa influencia no sector téxtil, senón tamén pola súa creatividade e estilo.

Non sabes que roupa meter na maleta? Aproveita a túa escapada á cidade coruñesa para cazar novas tendencias e completar os teus looks coas mellores pezas das tendas de moda da cidade, dende as grandes superficies, pasando polos ateliers ou locais de segunda man que se atopan en cada esquina da metrópole.

Goza da primavera no monte de San Pedro

Non hai mellor maneira de gozar do aire primaveral que mergullándote completamente na natureza. E poucos recunchos da Coruña son tan idóneos como o parque do monte de San Pedro.

En canto as nubes se comezan a afastar, unha visita ao noso miradoiro predilecto da cidade é obrigatoria. Reláxate perdendo a vista no horizonte do Atlántico, cunha panorámica que percorre a liña de costa ata Arteixo e as Illas Sisargas dun lado, e a ría da Coruña do outro.

E a flora tampouco defrauda. Nos meses de primavera, as carrascas que alagan as ladeiras do monte de San Pedro tinguen dun rosa violáceo o ambiente. Estas paisaxes, nas que brilla a natureza autóctona, tamén contan cunha das plantas máis típicas de Galicia: o toxo. Coa chegada da primavera, as súas características flores amarelas volven relucir combinándose co rosa das carrascas. A gama cromática continúa co azul das carrasquillas ou o branco das margaridas ou as borbonesas.

Castelo de San Antón

Visita o Castelo de San Antón

Unha das reliquias da cidade: unha antiga fortaleza construída no século XVI. Dos séculos XVI ao XVIII foi un edificio defensivo e prisión, máis tarde utilizouse como lazareto para illar aos mariñeiros que chegaban á cidade afectados dalgunha enfermidade infecciosa. O museo como tal inaugurouse en 1968. Considérase Monumento histórico-artístico desde 1949 e desde 1994 Ben de Interese Cultural.

O museo alberga obxectos de arqueoloxía como: ourivaría protohistórica, megalitismo, Idade de Bronce, cultura castrexa, romanización e distintos aspectos da cidade. Parte destes obxectos proceden do Castro de Elviña .

Pasea polo parque da Torre de Hércules e sumar ao Grupo Naturalista Hábitat

No parque escultórico da Torre de Hércules a arte e a natureza fúndense coas pezas artísticas que se esconden entre aves, arbustos e flores.

E se ademais gústache coñecer máis sobre a flora que che rodeas, tes a oportunidade de sumarche ás actividades organizadas polo Grupo Naturalista Hábitat, que habitualmente organiza xornadas de divulgación para coñecer a fauna e flora ou actividades de voluntariado e camiñadas ambientais.

Inaugura a tempada de praia

Para os máis atrevidos, a tempada de praia comeza antes na Coruña. Se as temperaturas acompañan, anímache a darche o primeiro mergullo do ano en calquera das praias coruñesas. Podes escoller entre Lapas, Matadoiro, San Amaro, Orzán ou Riazor, aínda que esta última conta con fieis bañistas ao longo de todo o ano.

Pasea polo porto máis aló da Mariña

Por último, un planazo na primavera é descubrir o porto coruñés máis aló da Mariña. Unha vez paseases baixo as brancas galerías, segue co mar á túa esquerda para chegar ao peirao portuario entrando pola praza de Ourense. Este é o lugar ideal para ter outra perspectiva do porto e descubrir unha das zonas de paseo máis novas da cidade.

De ruta

A cidade nunca perde a súa esencia, independentemente do tempo que acompañe. A Coruña conta cun paseo marítimo majestuoso de 13 quilómetros, considerado o máis longo de Europa continental.

Ademais, recomendámosche que non perdas a oportunidade de descubrir o Atlántico desde calquera parte da urbe como, por exemplo, a Xanela do Atlántico. Poucos atardeceres hai como o noso.

A Coruña en bicicleta

Outro plan ideal para esta época do ano é descubrir a cidade en bicicleta, percorrendo nosos máis de 45 quilómetros de carril bici.

O bo é que non terás que viaxar con ela ao lombo xa que poderás reservala nalgún dos negocios de aluguer de bicicletas da cidade ou aproveitar a oportunidade de BiciCoruña. ¿E que é BiciCoruña? Un servizo municipal co que, descargando a aplicación 'Bicicoruña app' poderás dispoñer dunha bicicleta en case calquera parte da cidade.

Que che parece esta sección?

-101-101-101

Síguenos en

Iniciar sesión