WOMEX 2023 puxo fin a cinco intensas xornadas de promoción e divulgación da música na Coruña cun gran éxito de participación e capacidades completas nos concertos organizados nas distintas localizacións durante a última semana.

Os datos de participación amosan o grande impacto que tivo esta cita na cidade: acudiron 2.750 profesionais de 105 países en representación de 1.385 compañías; celebráronse máis de 60 actividades e espectáculos repartidos en 7 escenarios da Coruña; 1.010 promotores de eventos, 570 selos discográficos e distribuidores; 460 institucións gobernamentais e educativas; 770 axentes discográficos, 700 mánagers e 320 produtores; 260 xornalistas nacionais e internacionais; 96 relatores e máis de 250 postos nos que se exhibiron os produtos e servizos de ata 703 compañías musicais de 58 países son algunhas das cifras que marcan o éxito desta edición de WOMEX A Coruña.

Un evento para dar a coñecer a música local na área global

Este domingo a xornada de peche tivo lugar no Teatro Colón cunha entrega de premios moi emotiva na que se entregaron dous galardóns: o Premio á Excelencia Profesional recaeu en 'On the Move' mentres que BCUC recolleu o premio a Artista WOMEX23. Posteriormente, o grupo ofreceu un concerto que levantou o público en moitas ocasións.

Durante a entrega de premios fíxose fincapé na importancia de WOMEX non só para dar a coñecer outras culturas ou cidades, senón para achegar a alma da música de cada área local ao ámbito global. Ademais, tanto os presentadores do evento como os artistas premiados destacaron que a esencia de WOMEX vai máis alá de crear vínculos a nivel profesional posto que, a nivel persoal, supón que artistas ou grupos poidan achegar algo positivo e así cambiar o mundo.

Próxima parada: Manchester

WOMEX 2024 terá lugar en Manchester do 23 ao 27 de outubro. Así o anunciou o representante municipal da cidade, Luthfur Rahman, quen convidou a todas as persoas asistentes a unha nova edición dun evento único no mundo.

Unha cidade, destacaron os presentadores da entrega de premios, moi similar á Coruña pola boa disposición e proximidade de espazos onde poder programar tanto a feira como as diferentes actuacións musicais.