- Inicio
- Prepara a túa viaxe
- O que non podes perder
O que non podes perder
Os mellores puntos para sacar fotos na Coruña
Hoxe en día na maleta de calquera persoa viaxeira non pode faltar a súa cámara de fotos. Desde o da réflex, a mirrorless, a analóxica ou mesmo a do móbil, calquera obxectivo é bo para facer dunha viaxe un álbum de recordos.
Ademais, na Coruña calquera recuncho préstase a ser fotografado. A tímida luz do sol séntalle xenial a esta cidade, na que os edificios falan por si mesmos e os recunchos naturais relocen ante a cámara. Pero para que vaias a tiro fixo (ou disparo fixo), contámosche cales son os mellores puntos da cidade para unha sesión de fotos e os que son de visita obrigada para o teu perfil de Instagram:
Xanela ao Atlántico + O Portiño
Comezamos moi preto do mar, na Xanela ao Atlántico, un particular monumento que atoparás nun dos extremos dos 13 quilómetros do paseo marítimo coruñés. Construído en granito e imitando a forma dun Ara Solis, esta escultura será o marco perfecto para encadrar unha foto única do horizonte atlántico.
Ademais, este é un lugar estratéxico para gozar dunha posta de sol que te deixará sen alento. Aínda que se o que prefires é gozar da hora dourada xunto a unha Estrella, recomendámosche que sigas por este mesmo camiño cara ao Portiño. O bar que aí se atopa é un dos segredos mellor gardados de coruñeses e coruñesas, e outro lugar que non pode faltar na túa listaxe de sitios por fotografar na Coruña.
O balcón do xardín de San Carlos
Se buscas unhas vistas espectaculares sobre o porto coruñés, o lugar ao que tes que ir é o balcón do xardín de San Carlos. Este pequeno espazo verde é un remanso de paz e un lugar con moito encanto, no que os olmos centenarios son protagonistas.
Despois de pasear entre o seu arboredo e fascinarte coa tumba de Sir John Moore, aconsellámosche que vaias ao balcón que se atopa nun dos extremos. Dende aí terás o encadre perfecto para fotografar o Castelo de San Antón, ver practicamente todo o porto coruñés e mesmo capturar a chegada de barcos e transatlánticos.
Porta de Aires
Seguimos por un clásico da Coruña, no que calquera instantánea lle fai a competencia a Notting Hill ou á illa de Burano. Falamos das escaleiras de Porta de Aires, unha estreita rúa que penetra na Cidade Vella dende un dos laterais da praza de María Pita.
A maxia deste encadre está na combinación entre os edificios de cores a ambos os dous lados da escaleira e parte do edificio que acolle o Concello da Coruña, de estilo modernista de principios de século. Situándote na parte superior das escaleiras lograrás un encadre moi simétrico que parecerá sacado dunha película de Wes Anderson.
Os museos científicos
Ciencia e fotografía nun mesmo lugar? Na Coruña non tes un, senón tres incribles museos científicos nos que sacar instantáneas únicas que non poden faltar no teu perfil de Instagram.
Unha obrigada é, sen dúbida, a Sala Nautilus do Aquarium Finisterrae. Este enorme acuario é o fogar de centos de peixes, entre eles quenllas, e é unha auténtica experiencia que traspasará a pantalla da túa cámara. Outro lugar imperdible é a Domus, un museo interactivo dedicado ao ser humano e que se atopa nun edificio cunha arquitectura única, obra do prestixioso arquitecto Arata Isozaki. As súas escaleiras que practicamente caen sobre a baía coruñesa son o lugar ideal para unha sesión de fotos antes da visita ao museo. Por último, o palacete que é sede da Casa das Ciencias, no alto do parque de Santa Margarida, tamén é un lugar ideal para xogar coas súas distintas perspectivas.
Torre de Hércules
Neste recompilatorio de lugares instagrameables non podía faltar o símbolo da Coruña, a Torre de Hércules. Este faro leva milenios cativando a aldeáns e visitantes e é fácil comprender por que. Desde o amencer ata o mesmo anoitecer, a Torre de Hércules brilla con luz propia.
Cando os raios do sol inciden sobre ela, devolve uns reflexos que fan que a súa pedra adquira matices dourados. Quizais por iso o xenio Pablo Picasso referíase a ela como a 'Torre de caramelo'. E pola noite, o faro non defrauda. A súa luz ilumina A Coruña de maneira intermitente e a súa base ilumínase cuns focos que, no medio da escuridade da noite, fan que pareza que este monumento flota no aire. Ademais, as súas 47 hectáreas de parque, un Espazo Natural de Interese Local, son o lugar perfecto para as persoas afeccionadas á fotografía de natureza.
Monte de San Pedro
Pero ás veces o mellor ángulo da Torre de Hércules atópase na outra esquina da Coruña. O parque do monte de San Pedro é sen dúbida o mellor miradoiro que hai sobre a cidade. Desde aquí terás unha vista panorámica da costa desde Arteixo e verás toda a baía que baña parte da península coruñesa.
O seu labirinto de estilo inglés, os canóns instalados en 1933, ou o restaurante Estrella Michelín son outras das localizacións que non poderás evitar fotografar na túa visita ao monte de San Pedro.
O Parrote e a Mariña
Acabamos este paseo polos lugares máis fotoxénicos da Coruña noutra das iconas da cidade. A zona do Parrote e a Mariña, xunto ao porto deportivo, conta con mil ángulos nos que sacar a relucir a túa creatividade coa cámara. Aquí poderás fotografar os cruceiros que habitualmente chegan á Coruña, así como os veleiros e barcos pesqueiros que están atracados no porto.
Por outra banda, as brancas galerías de cristal son o fondo perfecto para as túas fotos coruñesas. Completa o posado cun xeado das famosas xeaderías da Mariña ou gozando dun café ou unha cervexa nas terrazas cheas de vida que se sitúan debaixo das galerías.
Despois de todas estas recomendacións, terás unha lista completa de lugares que visitar e fotografar na Coruña, pero o mellor consello que che podemos dar é que aproveites a túa viaxe para pasear e perdéreste polas rúas coruñesas. E cando publiques as túas fotografías nas redes, non esquezas etiquetarnos e compartilas co hashtag #VisitCoruna e #ACoruñaesunMUST.
O que Drake perdeu na Cidade Vella
Se o pirata inglés levantase a cabeza tolearía escollendo un recuncho onde comer, onde mercar e onde gozar na Cidade Vella da Coruña, máis viva que nunca 433 anos despois daquela histórica vitoria da heroína María Pita .
A Cidade Vella non se engurra. Rexuvenece. Facendo honra á súa historia: aquí a heroína da Coruña, María Pita, fixo que os piratas de Drake fuxisen da nosa cidade. Corría o ano 1589. Sobre as súas lastras de pedra había un barrio xudeu que aínda conserva os nomes dos seus oficios; aínda podemos pasear pola rúa Ferrsrías. Aquí está sepulto sir John Moore. Aquí viviu Rosalía de Castro, a galega máis universal, e Emilia Pardo Bazán, aquí latexa a universidade e a vida, baixo cada pedra e sobre cada pedra.
É difícil atopar un barrio que en tan pouco espazo garde tanta vida, tanta riqueza cultural e tanta historia. E a Cidade Vella, berce dos acontecementos máis importantes da Coruña, segue sendo un lugar máxico que rexuvenece cos anos e que se atopa en plena explosión de gastronomía, artesanía e diversión.
Co Concello á esquerda, este percorrido pola Cidade Vella, arrinca nun dos puntos de moda da cidade: Omakase, o xaponés escondido que conta entre a súa clientela a Marta Ortega, presidenta de Inditex. Este local é un reflexo do que está a pasar na Coruña, unha cidade chea de sabores, na que en moi poucos metros de distancia uno pode gozar do mellor sushi nunha barra que lembra ás de Tokio ou tomarse albóndegas xigantes na Roda, na rúa Capitán Troncoso. É esta rúa unha das máis animadas para gozar da hostalaría da Coruña, desde os berberechos do Malpica aos brunchs dos fins de semana na Teresa.
Aquí están instaladas desde hai uns meses dous dos motores da Cidade Vella: Tatiana Rega e Amanda de Diego, nai e filla, creadoras do Taller de Amanda, unha das tendas con máis personalidade da cidade. Elas forman parte das mentes creativas que elixiron o casco antigo. As dúas traballan a man creando bolsos, candeas con aroma atlántico e unha cerámica única. Tamén son especialistas en cestas de agasallo e organizan obradoiros que levan á terraza da súa tenda na rúa Capitán Troncoso. É doado atoparse con elas animando as clases de cerámica mentres se goza dun viño galego á tardiña.
Moi preto do Taller de Amanda está un dos anuncios máis instagrameables da Coruña (e a foto sen a que non podes marchar): as casiñas de cores e a vista do palacio municipal desde o alto das escalinatas de Porta de Aires. Pero o enclave que rouba o corazón a calquera visitante ou veciño da cidade é a preciosa praza de Azcárraga: acubillada por árbores centenarias, aquí hai que vir se un quere gozar as fins de semana dunha sesión vermú con moito encanto.
Despois, un pode parar a comer en Espiga , o novo restaurante da rúa Santiago. Con paredes de pedra vista, símbolo da arquitectura galega, e unha gran cociña á vista do público, é un dos mellores locais para darse unha homenaxe con produtos da terra.
Calquera coruñés ten na súa listaxe de tips tres locais da Cidade Vella: o café A Dársena, coas mellores vistas ás impoñentes galerías da Mariña; o Salgueiro, coa súa famosa tortilla, e o Momos, fronte á Igrexa de Santo Domingo, unha das terrazas máis míticas da Coruña.
Todos estes locais conviven con tendas de toda a vida e novos negocios que lle dan un aire moi cosmopolita a este enclave.
É o caso de Arobe Cerámica (rúa San Francisco, 2), o taller con clases de cerámica do artesán Alejandro Roig, que revolucionou este oficio. As súas clases teñen listaxe de agarda de máis dun ano. Ao seu lado está un dos espazos máis cool da Cidade Vella: Troppo, un local de aperitivos italianos con tenda de vinilos. O mellor é deixarse levar polas rúas empedradas, parar a contemplar a beleza da igrexa da Colexiata; descubrir como un grupo de mozos aprende a facer crochet nen El taller de mi vida (rúa Ferrarías, 12); comprar un ramo de flores na Florería (rúa Porta de Aires, 12), a floraría máis parisiense da Coruña; ou ler un libro, recentemente saído da librería Berbiriana (rúa Santiago, 7), nun dos bancos que habitan as súas rúas empedradas; alugar unha bici en Ok zona eBike (paseo da Dársena, 15) ou dar unha masaxe con vistas ao mar en Öa (paseo da Dársena, 4). Nin María Pita podería ter imaxinado un futuro mellor para a súa vella cidade.
Os 10 mellores plans para facer en familia na Coruña
A Coruña é unha cidade cómoda e acolledora. Nas súas rúas todo queda preto, resulta sinxelo moverse por ela e a oferta de lecer e cultural sempre está a se actualizar. Por iso, este é un destino ideal para a túa próxima escapada en familia.
Dende experiencias únicas en museos, ata actividades deportivas ou outras máis culturais, na Coruña hai opcións para grandes e pequenos. Estas son as nosas recomendacións dos 10 mellores plans para facer na Coruña con nenas e nenos:
Pasar un día de entre ondas e area
Se nos visitais durante os meses de máis calor, un plan perfecto é un día en familia na praia. Divertídevos xogando coas ondas, botando unha partida ás pas ou construíndo castelos de area na beira. Na Coruña tedes moitas praias ao longo de toda a península para elixir, pero recomendámosvos dúas polo seu ambiente máis familiar: a praia de Riazor, en pleno centro da cidade, e a do Areal ou Lapas, xusto á beira da Torre de Hércules.
Visitar o Aquarium e vivir unha aventura coas focas
Un dos museos máis queridos na Coruña é o Aquarium Finisterrae. Esta é unha parada obrigatoria en calquera visita á nosa cidade e as propias familias coruñesas acoden a este museo de forma regular.
No Aquarium, ademais de visitar as súas múltiples salas expositivas, poderedes ver moi de preto como se lles dá de comer ás focas que viven nas piscinas exteriores. Para participar neste taller de divulgación científica para maiores de 7 anos, que se realiza ata xuño, é necesario reservar as entradas previamente.
Descubrir a cidade polo carril bici
A Coruña tamén é unha cidade para descubrir en familia de forma sustentable e saudable. Aquí hai máis de 45 quilómetros de carril bici que pasan polos principais puntos turísticos da cidade, como o Obelisco, o Castelo de San Antón ou a Torre de Hércules, ademais do paseo marítimo, e que conectan tamén cos barrios.
Ademais, non fai falta que veñades coa bicicleta ao lombo. Na cidade atoparedes múltiples opcións de alugueiro de bicicletas.
Dar un paseo nos Cabaliños dos Xardíns
Ademais de en bicicleta, hai outra forma de descubrir un dos lugares máis emblemáticos da cidade sobre rodas. Trátase dos Cabaliños dos Xardíns que atoparedes nos céntricos Xardíns de Méndez Núñez. Un clásico das infancias coruñesas, estes coloridos cabaliños funcionan a pedais e percorren o tramo dos xardíns entre o edificio da Terraza e o Palco da Música nos períodos vacacionais, pontes festivas e fins de semana.
Ir ás naves do Metrosidero
Moi preto da zona vella atópase un dos lugares de moda para a mocidade coruñesa. Trátase das Naves do Metrosidero, un recinto que é xa un punto de encontro para a xuventude a partir de 12 anos con instalacións que albergan talleres, espectáculos e mesmo un parque de skate e unha zona de escalada.
Voar papaventos na Torre de Hércules ou no Monte de San Pedro
A Coruña é unha cidade na que é frecuente que haxa días de fortes ventos. Pero lonxe de ser un inconveniente, esta é a oportunidade perfecta para facer unha das actividades favoritas das familias coruñesas: voar papaventos.
Os mellores lugares para gozar desta actividade en familia son o parque xunto ao CIAV da Torre de Hércules, o faro máis antigo do mundo aínda en funcionamento, ou o Monte de San Pedro, alén da baía e que esconde outro planazo en familia.
Intentar saír do labirinto do Monte de San Pedro
No mesmo parque do Monte de San Pedro teredes unhas vistas espectaculares sobre A Coruña. Tamén poderedes saborear a gastronomía coruñesa nun restaurante Estrella Michelín, pasear polos seus máis de 90.000 metros cadrados de natureza ou ver de preto os canóns Vickers.
Pero o plan máis divertido non é probablemente ningún destes. O Monte de San Pedro alberga tamén un precioso labirinto de estilo inglés. Atrevédesvos a intentar saír del?
Ir a un partido do Dépor ou do Liceo
Se sodes unha familia deportista, nos vosos plans de viaxe á Coruña non poden faltar unhas entradas para un evento deportivo. Durante todo o ano a cidade acolle distintas competicións, desde algunhas regulares ata torneos e campionatos de nivel autonómico, nacional ou mesmo internacional.
Entre os máis clásicos está ir ver un partido de fútbol do Dépor e ser un máis na marea branquiazul, no histórico estadio de Riazor no caso do equipo masculino, ou en Abegondo, co feminino. Outro bo plan é acudir a un encontro do Liceo, un dos mellores equipos de hóckey de España en categoría masculina, ou do Hóckey Club Coruña Feminino, que compite na OK Liga.
Divertirvos no Parque de Bens ou no de Eirís
Outro dos espazos naturais preferidos polos nenos e nenas da Coruña é o Parque de Bens . Con máis de 60 hectáreas, aquí contades con 13 quilómetros de carreiros para percorrer, unha estupenda zona de xogos infantís con xogos adaptados a nenas e nenos con discapacidade e unha área de lecer con mesas e cadeiras, ideal para un picnic.
Por outra banda, o parque infantil de Eirís é un dos máis completos da cidade. Aquí atópase unha tirolina dobre e tobogáns para deslizarse pola ladeira nun desnivel natural do propio parque. Ademais, moi preto tedes unha das múltiples pistas de skate da cidade.
Marineda City para nenos e nenas
Por último, cerramos esta proposta de plans en familia desde Marineda City. Este centro comercial, un dos máis grandes de España, ten moito máis que tendas e espazos de restauración.
As súas salas de cinema Cinesa, os karts do Karting Marineda, o seu salón de birlos, as súas recreativas ou a zona Marineda Kids dedicada aos máis pequenos son unha alternativa estupenda de lecer en familia.
