Moitas veces non somos conscientes das marabillas que nos arrrodean, dos bonitos parques que temos a tan só un paso para desconectar e respirar, dos museos e igrexas nos que buscar inspiración, da suavidade da area desa pequena cala na que afundimos os pés... O bo da Coruña é que somos unha cidade con todo o que pode facerche feliz por uns días, dous meses, catorce anos ou toda unha vida.

Así, aproveitando que xa queda pouco para despedir o verán, queremos deixarche un par de lugares onde sentir os últimos raios de sol para coller enerxía e poder volver á rutina de novo. Dános igual de onde veñas, só queremos que experimentes a nosa cultura de vivir.

Xanela ao Atlántico

Din que todos os camiños levan a Roma, e nós temos un paseo marítimo que nos conduce aos lugares máis emblemáticos da nosa cidade, como a Xanela ao Atlántico.

Este particular monumento foi construído en granito imitando a forma dun Ara Solis. Sen dúbida, é un punto estratéxico para despedir ao astro rei e inmortalizar o momento cun encadre de ilusión.

Monte de San Pedro

Sen dúbida, un dos parques máis bonitos e con mellores vistas da cidade. O seu labirinto de estilo inglés, os canóns instalados en 1933 ou a baía que baña a península coruñesa son algunhas das localizacións que non poderás evitar fotografar na túa visita.

Todo iso, por suposto, unido á posibilidade de vivir unha experiencia única e ver a posta de sol desde un miradoiro espectacular.

Por terra, mar e aire. A beleza do noso paseo marítimo, catalogado como o máis longo de Europa continental, pode apreciarse desde calquera punto. Mais o mellor de todo é que percorréndoo poderás atopar monumentos, edificios, locais e parques cheos de vida e moita historia.

Aquí deixámosche varios lugares emblemáticos que non podes perder na túa escapada á Coruña.

Castelo de San Antón

Antiga fortaleza construída no s. XVI. Do s. XVI ao XVIII foi un edificio defensivo e prisión aínda que máis tarde actuou como lazareto onde illar aos mariñeiros que chegaban á cidade afectados dalgunha enfermidade infecciosa.

No seu interior atópase o Museo Arqueolóxico da Coruña, inaugurado como tal en 1968. Considérase Monumento histórico-artístico desde 1949 e desde 1994 Ben de Interese Cultural.

O faro máis antigo do mundo

Son varios os carreiros que che levarán ata a Torre de Hércules, o faro en funcionamento máis antigo do mundo, se te aventuras a camiñar polo noso paseo marítimo.

Ademais, poderás descubrir parte da historia da Coruña penetrando no parque escultórico da propia Torre, cheo de esculturas e estatuas que son parte do patrimonio e da historia da cidade.

A Coruña continúa bailando. Non para. É a súa forma de vivir. Tras un agosto de festas, a cidade "que dorme de pé" prepárase para moito máis.

Aínda coa resaca festivaleira recente, comeza o mes de setembro con máis música ao ritmo do Recorda Fest, ao que seguirá o Wake Up Weekend da man de Pull&Bear e o Grupo Pelícano. E, como colofón, o festival Noites do Porto que se desenvolverá no Porto do 23 ao 28; aínda que tamén haberá tempo para degustar a Tempada Lírica desde o 8 ao 29 de setembro en diferentes espazos da cidade.

Ademais, hai moitas exposicións interesantes na cidade como Reverberos, instalada no interior da Torre de Hércules.

Non perdas ningún plan coa nosa guía!